جامع العلوم کا آغاز 14 جولائی 1955ء کو ہوا، جب ملتان شہر کی ایک چھوٹی سی مسجد میں صرف ایک استاد اور تین طلبہ نے مل کر اس مبارک ادارے کی داغ بیل ڈالی۔ کچھ عرصہ بعد جب یہ مسجد مدرسہ کے لیے ناسازگار ثابت ہوئی تو منتظمین نے چوک دولت گیٹ کے باہر، شہر سے کچھ فاصلے پر چھ کنال زمین خرید لی اور تعمیرات کا انتظام کیے بغیر درختوں کے زیرِ سایہ تدریس کا سلسلہ جاری رکھا۔ مگر چند ہی ماہ بعد اہلِ خیر حضرات کے تعاون سے ایک مسجد، چند درسگاہیں اور قیام گاہیں تعمیر کر دی گئیں۔

انیس سو پچپن میں ایک درخت کے زیرِ سایہ پروان چڑھنے والا یہ ننھا سا پودا آج ایک شاداب، تناور اور ثمر آور درخت بن چکا ہے، جس کی چھاؤں علم، تربیت اور رہنمائی کے متلاشیوں کو مسلسل فیض یاب کر رہی ہے۔ ادارہ ہذا کی بصیرت افروز قیادت، باصلاحیت انتظامیہ اور مخلص و محنتی اساتذہ کی شبانہ روز کاوشوں نے اسے دینی و عصری تعلیم کے میدان میں ایک ممتاز اور باوقار مقام عطا کیا ہے۔ یہ ادارہ نہ صرف دینی حلقوں میں اپنی مضبوط شناخت قائم کر چکا ہے بلکہ جدید تعلیمی میدان میں بھی نمایاں کامیابیاں حاصل کر رہا ہے، جہاں طلبہ نے بورڈ آف انٹرمیڈیٹ اینڈ سیکنڈری ایجوکیشن ملتان، بہاولپور اور ڈیرہ غازی خان، نیز بہاؤالدین زکریا یونیورسٹی ملتان میں اعلیٰ پوزیشنیں حاصل کر کے ادارے کا نام روشن کیا ہے۔

جامع العلوم ملتان کے فارغ التحصیل طلبہ آج پاکستان کے مختلف نمایاں تعلیمی اداروں اور قومی محکموں میں اپنی خدمات انجام دے رہے ہیں۔ ان میں اسلامیہ یونیورسٹی بہاولپور، اسلامیہ یونیورسٹی اسلام آباد، پنجاب یونیورسٹی، ایچی سن کالج لاہور اور دیگر متعدد کالجز و یونیورسٹیز شامل ہیں، جہاں یہ طلبہ علم، تدریس، تحقیق اور انتظامی شعبوں میں اہم کردار ادا کر رہے ہیں۔ اس کے ساتھ ساتھ مختلف سرکاری و نجی اداروں میں بھی جامعہ کے طلبہ اپنی صلاحیتوں کا لوہا منوا رہے ہیں، جو اس ادارے کی معیاری تعلیم، بہترین تربیت اور مضبوط بنیادوں کا واضح ثبوت ہے۔