جہاں تک اس قسم کے مدرسے کے ذکر کردہ مقصد کا تعلق ہے مجھے اس سے پورا اتفاق ہے اور خود میں بھی کافی عرصہ سے اس ملک میں اس مقصد کا حصول ضروری سمجھتا ہوں. اس کی تحصیل کے ذرائع و وسائل سوچ رہا ہوں آپ نے بھی اس کے لیے ایک نظام تعلیم سوچ کر عملا جاری کر دیا ہے خدا کرے آپ کو کامیابی حاصل ہو جائے آپ نے اس نصاب اور طریقے تعلیم کی چند خصوصیات کا ذکر فرمایا ہے ان خصوصیات کو کسی دارالعلوم میں پیدا کرنا میرے ہاں بھی ضروری ہے۔ دین کے بہترین عالم اور علوم جدیدہ کے بہترین فاضل اگر عملا تیار کیے جائیں تو یہ آپ کے جامع العلوم کی واقعی ایک ممتاز اور نمایاں خصوصیت ہوگی۔ قدیم و جدید کے امتزاج کا میں بھی قائل ہوں اور اس کو اس وقت کی ایک اہم ضرورت سمجھتا ہوں لیکن اس سلسلہ میں محض نظری طور پر عمدہ سے عمدہ نصاب بنایا جا سکتا ہے۔ لیکن عملا اس نصاب کو جاری کر کے اس کے مطابق تعلیم و تدریس کا نظام چلا کر مطلوبہ خصوصیات کے فارغ و تحصیل علماء فضلا تیار کرنا بظاہر بہت مشکل معلوم ہوتا ہے کیونکہ عموما دیکھا جاتا ہے کہ جہاں اس امتزاج کی کوشش کی گئی ہے یا تو عصری علوم اتنا غلبہ کر دیتے ہیں کہ اصل دینی علوم اور ان کی خصوصیات اور ان کے عملی اور علمی مظاہر سب کچھ دب جاتے ہیں طلبہ تھوڑی بہت انگریزی سیکھ لیتے ہیں لیکن دینی علوم میں مہارت کچھ حاصل نہیں ہوتی اور افکار و خیالات اور اعمال و اخلاق کے لحاظ سے وہ نہ صرف یہ کہ عام انگریزی خانوں جیسے ہو جاتے ہیں بلکہ دینی علوم کے اعتبار سے ان میں احساس کمتری پیدا ہو جاتا ہے اور ان کی ذہنیت کچھ شکست خوردہ سی ہوتی ہے اور یا اگر نصاب میں قدیم عنصر زیادہ ہو پھر قدامت اس قدر غلبہ کر دیتی ہے کہ عصری علوم کی طرف کچھ بھی توجہ نہیں ہوتی اور اس اعتبار سے وہ ناکام ہوتے ہیں اس لیے آپ حضرات اگر عملا اپنے مقصد کے حصول میں کامیاب ہو گئے اور قدیم و جدید کے توازن کو برقرار رکھا اور طلبہ میں واقعی صلاحیت پیدا کی گئی تو میں سمجھوں گا کہ مدارس کی دنیا میں علمی میدان میں یہ آپ کا ایک تجدیدی کارنامہ ہوگا اور لائق تحسین و آفرین اور قابل صد مبارکباد

اللہ تعالی آپ حضرات کو کامیابیوں سے ہمکنار فرمائے آمین